Jemi ende në kohë për të bërë recetën origjinale me fiq. Por unë nuk kënaqem, që fokaçen time të preferuar, ta gatuaj vetëm në një stinë, ndaj e dua gjatë gjithë vitit. Po kështu e do dhe mikesha ime Majlinda, që e ka ditëlindjen në maj, dhe e kërkon madje t’ja shpiem dhe në restorant, lokal, a ku të qëllojë që të mbledhë mikeshat (kamarierët na falin, kur u themi, që është një gatim shumë special).

Receta origjinale kërkon pesë ose gjashtë fiq të pjekur dhe dy a tre lugë mjaltë. Më poshtë është varianti im me glikonë e fikut dhe lëngun e saj.

Përbërësit për brumin

350 g miell; 150 ml qumësht; 60 g gjalpë në temperaturë ambienti; 1 lugë e vogël kripë; 1 lugë e vogël sheqer; 12 g maja birre e freskët që tretet në 3 lugë ujë të vakët.

Për mbushjen

150 g djathë gorgonzola; 6-7 kokrra gliko fiku; një grusht arra të qëruara; pak rozmarinë të freskët, 3 lugë lëng glikoje.

Përgatitja:

Në një tas hedhim majanë në thërrime, ujin dhe sheqerin dhe i përziejmë sa të tretet majaja. Shtojmë më pas qumështin, miellin, gjalpin dhe kripën. I përziejmë, derisa të përftojmë një brum të butë që nuk ngjit.

Hapim brumin me petës e pak miell, e vëmë në një tavë të lyer më parë me pak vaj, shpërndajme djathin, fiqtë, pak rozmarinë, arrat dhe i spwrkasim me lëngun e glikosë.

E vëmë të piqet të furrë derisa brumi të marrë ngjyrë dhe lart dhe poshtë.