Kujtim Gjuzi ma solli këto kohë ndër mend këtë peshk të jashtëzakonshëm që ka qenë ushqimi i mbretërve pellazgë. Referencat historike të Kujtimit janë të pakundërshtueshme.

Prandaj, më ndodhi të bëja një zbulim; këtë vit gjuhëza gjendet pak me vështirësi. Ka gjasë të jetë trembur nga reformat e qeverisë ose bllokimet e rrugëve detare prej lundërtarëve të Lulit.

Nejse, më në fund gjeta gjuhëz dhe ma pastruan e ma bënë gati.

Tani halli është si do e bëjmë?

Përbërësit:

Peshk gjuhëz (700 gramë)

Gjalpë (30 gramë)

Vaj ulliri

Majdanoz (1 tufë)

Limon (1 kokërr)

Verë e bardhë (1 gotë uji)

Miell

Kripë

Përgatitja:

Copat e gjuhëzës i lajmë dhe i thajmë me letër kuzhine. Pastaj i kalojmë në pjatën me miell në të dyja anët. Në një tigan shkrijmë gjalpin dhe shtojmë një lot vaj ulliri. Vendosim copat e gjuhëzës dhe i skuqim në të dyja anët. Pastaj shtrydhim limonin dhe lëngun e tij e bashkojmë me verën e bardhë. I shuajmë gjuzat dhe me zjarr shumë të ngadaltë presim derisa të avullojë alkoli ee të krijohet një lëng kremoz. Fikim zjarrin dhe hedhim majdanozin e prerë hollë.

E shërbejmë me një gotë verë të bardhë dhe ndalemi për një çast të mendojmë sa të zotë kanë qenë pellazgët që na e trashëguan këtë lloj peshku.