Nëse bëni këtë tiramisu me karamel të kripur do ndjeheni pastiçierë prej vërteti

7 ditë me parë / nga Iva Tico
Iva Tico

Le të bëjmë në fillim pak histori: është ëmbëlsira më e dashur, më e njohur dhe më e shitur në botë. U shpik në fillim të viteve ’70 edhe pse nuk ishte plotësisht një shpikje: thjesht duke bërë bashkë përbërës që kishte kohë që përdoreshin, lindi një ëmbëlsirë që ndezi fantazinë e të gjithëve dhe që s’i reziston askush.

Tiramisu e tregon që në emër efektin që jep: ma ngri humorin mund të shqipërohej tamam tamam. Eshtë ëmbëlsira ideale për pas buke, ka edhe sheqerin që të nevojitet, edhe kafen brenda. Dhe është e lehtë (në shije e kam fjalën, sepse nuk e kam zakon të merrem me kaloritë). Në variantin që provova fundjavën e shkuar, kishte një shtesë shumë speciale: kremin me karamel të kripur. Kripa e kremit dhe kikirikëve sipër ekuilibronte shijen në mënyrë të jashtëzakonshme. Ishte kaq e mirë, sa u pendova që nuk e kisha bërë deri tani. Më kishte stepur vetëm ai shënimi “për ekspertë” që shkruhej në krye të recetës kur e gjeta në një revistë italiane. Tani o jam unë me të vërtetë eksperte, o ata që kanë bërë revistën na kanë marrë të gjithëve me të mirë. Nëse e bëni, më thoni si ju duket. Domethënë si është kjo puna e vështirësisë. Se shija nuk lë vend për diskutim.

Përbërësit për karamelin e kripur (12 gota)

460 gr panna të freskët; 120 gr sheqer; 50 gr gjalpë, 8 gr fletë xhelatine; 2 gr kripë

Përbërësit për kremin me mascarpone

500 gr mascarpone; 200 gr sheqer; 6 të verdha vezësh

Për të kompozuar gotat me tiramisu

Biskota savoiardi; kikirikë të pjekur, kafe ekspres.

 

Përgatitja

Vendosim fillimisht fletët e xhelatinës në një tas me ujë të ftohtë.

Vereni sheqerin të shkrijë në zjarr të mesëm dhe lëreni derisa të kthehet në një karamel në ngjyrë lajthie. Ngrohni më vete 200 gramë pana bashkë me gjalpin dhe kripën dhe lëreni në zjarr derisa gjalpi të ketë shkrirë plotësisht. Bashkoni panën e nxehtë tek karamelja. Duhet ta bëni me kujdes, hidheni, e pak e nga pak pasi krijon flluska dhe shumë avull, trazojeni mirë dhe vazhdoni derisa ta hidhni krejt panën, pastaj hiqeni nga zjarri dhe lereni të ftohet mënjanë.

Kur karameli të jetë ftohur ca dhe të arrijë një temperaturë rreth 60 gradë, hidhni aty fletët e xhelatinës dhe përziejini me mikser me zhytje (atë që përdorim për supat kremoze). Shtoni pjesën tjetër të panës dhe trazojeni sërish me mikser dhe pastaj futeni në frigorifer ku duhet të pushojë së paku dy orë.

Pasi ta nxirrni nga frogoriferi rriheni me rrahësen elektrike të kekut, derisa të bëhet një krem i njëtrajtshëm. Hidheni në fund të 12 gotave. Për të pasur një efekt më të bukur, mund t’i vendosni gotat  për 15 minuta në ngrirje, të shtrira me një kënd.

 

Për kremin e maskarpones

Rrihni të verdhat e vezëve në rrahësin elektrik për së paku 10 minuta. Shtoni pastaj maskarponen, në fillim me shpejtësi të ulët dhe pastaj rriteni gradualisht, jo më shumë sesa 5 minuta.

Për të kompozuar tiramisunë

Nxirrni nga ngrirësi gotat. Mbulojeni karamelin me biskotat savoiardi që i keni lagur më parë një e nga një në kafen ekspres. Hidhni sipër kremin mascarpone dhe lërini në frigorifer për të paku tri orë. Zbukurojini me kikirikët e pjekur.