Më në fund ju paraqes një mus çokollate 100 për qind profesional!

1 muaj me parë / nga Iva Tico
Iva Tico

Kur më ftuan të bashkohesha një pasdite në kuzhinën e restorant “Kriper”, për një rubrikë të veçantë “Chef to Chef”, që e realizojnë çdo javë thashë menjëherë “po”. E para, sepse gjithmonë më ka pëlqyer të shoh nga brenda se si gatuhet në kuzhinat e restoranteve të mëdha, nën presionin e kohës dhe kërkesës, që çdo gjë të jetë cilësore dhe e bukur njëkohësisht. E dyta, sepse nuk mund të mos mbështes gjithë ata sipërmarrës, si në këtë rast restorantin në fjalë, që investojnë jo vetëm në teknologji dhe në arredim, por edhe në burime njerëzore, duke mbledhur rreth vetes stafe të rinjsh të përkushtuar që punojnë jo vetëm në kuzhinë, bar dhe në shërbim por edhe në marrëdhënie me publikun, muzikë, gazetari. E pra, Kriper, veç stafit të përhershëm të çdo restoranti, i bën të gjithë këta njerëz bashkë: Mirelën e PR që kujdeset për klientët, që përzgjedh muzikën Live dhe artistët që vijnë aty fundjavave,  por dhe një miniredaksi me Kristinën moderatore, Elian fotografe dhe Ervinin, kameraman.

Siç dhe e prisja, kalova një pasdite e më pas një darkë shumë të këndshme. Në kuzhinë gatuam peshk në kripë (gjëja më e thjeshtë në botë, peshkun e pastruar e vendos mbi shtrat kripe kokërrtrashë, e mbulon të gjithin me kripë dhe e pjek për rreth 25 minuta në furrë), qofte salmon (dhe kjo kollaj, pritet fileto e pastruar në copa të vogla, shtohet vezë, erëza, bukë e thërruar, bëhen forma dhe skuqen) dhe një mus çokollate që doli thjesht spektakolar. Prisja të bënim diçka në gotë, por u bë më bukur se kaq: e vumë të pushonte në frogorifer në forma gjysmë sferike, në mes të të cilave dhe në pjesën e sipërme u shtrua nja një fetë rrumbullake pandispanje me çokollatë (recetën e pandispanjës e gjeni në postimin e mëparshëm, thjesht shtojini çokollatë të shkrirë ose kakao të hidhur) dhe pasi ëmbëlsirat qëndruan kohën e duhur në frigorifer u veshën sipër me ganache çokollate dhe u zbukuruan me krem çokollate të bardhë. Më poshtë po shkruaj përbërësit dhe përgatitjen për musin e thjeshtë që mund ta shërbeni në gotë, përshtatur me kushtet e shtëpisë dhe jo me përmasat që u gatua në restorant. Për ganachen (nëse do doni të bëni dhe ju një mus “professional”), 100 gramë çokollatë fondente shkrijeni në 80 ml qumësht të nxehtë dhe lëreni në zjarr për rreth 5 minuta, duke e përzierë që të mos kokrrëzohet, derisa të bëhet një masë homogjene. Kur të ftohet, hidheni mbi ëmbëlsirat që do kenë një shkëlqim pasqyre.

Përbërësit

3 të verdha veze në temperaturë ambienti

4 fletë xhelatine

150 gr çokollatë fondente

2 lugë sheqer

200 ml qumësht

Përgatitja

Vendosim fletët e xhelatinës në ujë të nxehtë.

Ngrohim qumështin dhe hedhim në të çokollatën që të shkrijë.

Në një erë rrahim vezët, shtojmë sheqerin dhe xhelatinën. Kur qumështi me çokollatën e shkrirë të jetë ftohur, e shtojmë në këtë masë dhe e rrahim me dorë me rrahësen e kekut për rreth 5 minuta, sa të nisë të trashet.

E hedhim me spatul nëpër gota dhe e lëmë të pushojë në frigorifer. Është më i mirë të hahet të nesërmen. Mund ta zbukurojmë sipër me fruta të freskëta.