Lasagna me kungull dhe presh si kuzhinë tradicionale shqiptare

5 vjet me parë / nga Enkel Demi
Enkel Demi

Kur Iva Tiço bëri një quizzInstagram, në të cilin pyeste: “E gjeni dot si quhet kjo pjatë e kuzhinës tradicionale shqiptare?”, pjesa më e mirë i përgjigjej lasagna. Në fakt, bëhej fjalë për një paça të Çamërisë, por ajo që të bën përshtypje ishte që lexuesit tanë të shtrenjtë e vlerësojnë lasagna-n pjesë të kuzhinës tradicionale.

Natyrisht, nuk ka asgjë të keqe që brenda natyrës së kuzhinës sonë të përshtatet edhe një pjatë që vjen nga gjetkë. Tek e fundit, kuzhina nuk është demonstrim i dashurisë kombëtare, përkundrazi ajo zhvillohet duke shkëmbyer me të tjerët. Italianët nuk do i kishin njohur recetat me pasta (makarona), nëse Marco Polo nuk do i kishte sjellë ato nga Kina. Sot, ata kanë me mijëra receta të këtilla, ndërsa ne, shqiptarët nuk kishim nevojë të shkonim deri në fund të botës t’i njihnim makaronat, sepse i kishim jufkat tona shumë të lashta, por i zhvilluam vetëm në një apo dy receta.

Ndaj, sot unë recetën time me lasagna po e trajtoj si kuzhinë tradicionale.

Përbërësit:

Presh (1 copë i plotë)

Kunguj (3 ose 4, varet nga madhësia)

Qumësht (1 litër)

Djath mozzarella (1/2 kilogram)

Djath parmigiana (200 gramë)

Vaj ulliri

Gjalpë (200 gramë)

Lasagna (500 gramë)

Miell (tre lugë gjelle)

Kripë

Përgatitja:

Në një kusi hidhni vajin e ullirit dhe një gjysëm lugë gjelle me gjalpë. Preshët e prerë hollë skuqini sa të marrin një faqe me zjarr mesatar. Pastaj shtoni kungullin e grirë në rende pa ia qëruar lëkurën, vetëm mjafton t’i lani mirë. Nëse dëshironi të keni më shumë ngjyra mund të grini dhe një karrotë. Pasi kavardisen së bashku me zjarr gjithmonë mesatar hidhni në harxh një gotë qumësht. Prisni sa të mpikset disi masa dhe lëreni mënjanë me zjarr të shuar.

Bechamel-i:

Në një tjetër kusi hidhini gjalpë dhe më pas tre lugët e miellit. Përzijeni teksa skuqen bashkë me lugë druri që mielli mos të kokërrzohet. Më pas, nisni dhe shtini qumësht nga pak, përherë duke e përzier, sepse nuk duhet bërë mielli kokërr, por duhet të tretet. Vërvisni një majë luge kripë dhe vazhdoni përzierjen, derisa të krijohet një masë jo shumë e lëngëshme e bardhë.

Lasagna:

Merrni një tavë dhe lyejeni me gjalpë që mos të ngjisin fletët e lasagna-s. Unë zakonisht nuk i ziej fletët, sepse përdor lasagna të freskët, por këtë gjë e bëj edhe kur e marr me pako. Nëse dëshironi mund t’i fusni fletët e lasagna-s në një kusi me ujë të valuar, por vetëm 30 sekonda.

I shtrojmë fletët e lasagna-s në tavë. Hedhim mbi to preshët me kunguj, e shpërndajmë masën e gjelbër me një lugë druri. Të njëjtën gjë bëjmë edhe me bechamel-in. Pastaj, hedhim djathin mozzarella të prerë në kubikë dhe me dorë djathin parmigiano. Shtrojmë sërish fletët e lasagna-s dhe përsërisim të njëjtën gjë. Vendosim dhe shtresën e tretë dhe përsëri sipër hedhim ç’na ka mbetur nga harxhi dhe të tjerat. Nuk vendosim shtresë tjetër, por e shtijmë në furrë të ventiluar me 200 gradë celcius.

Ju betohem për kokë të kuzhinës tradicionale shqiptare që është pjatë shumë e shijshme, të cilën e gatuan dhe nana ime që më tradicionale nuk ka ku të shkojë.