Kek me mollë fare pa yndyrë, siç e bën teta Vojsava

3 muaj me parë / nga Iva Tico
Iva Tico

Teta Vojsava është mami i shoqes sime Joridës. Ndryshe nga shumë mama të tjera për të cilat një ushqim sa më shumë yndyrë, (gjalp apo vaj) të ketë, aq më i mirë është, ajo preferon të mos e teprojë fare. Madje edhe ta shmangë, si në rastin e këtij keku me mollë që nuk ka as gjalpë as vaj, por që teta Vojsava e ka zëvendësuar me mascarpone. Kështu mund të hamë pa na brerë ndërgjegjja se po e teprojmë.

Keku i saj është shumë i thjeshtë për t’u bërë, nuk harxhon aspak kohë dhe mund të jetë një mëngjes mëse i shijshëm për të shoqëruar kafen, përpara se të ikni në punë.

Përbërësit

1 gotë miell

1 gotë sheqer

4 vezë

1 kuti 250 gr mascarpone

1 pluhur kanelle

1 fryrës ëmbëlsirash me aromë vanilje 16gr

4 mollë mesatare

 

Përgatitja

Rreh vezët me mikser, pastaj hedh sheqerin, pastaj mascerponen, pastaj miellin dhe fryrësen me vanilje dhe vazhdon i përzien të gjitha bashkë në rrahësen elektrike.

Pastaj dy kokrra nga mollët i qëron dhe i pret në kubikë me dorë.

Mollët e grira bashkë me masën e mësipërme i përzien me lugë.

Pastaj shtrohet e gjithë masa në tavë të lyer me gjalpë dhe me dy mollët e tjera e dekoron sipër.

Furra duhet të jetë e ngrohur më parë në 180 gradë. Piqet në këtë temperaturë për 50 minuta.

Kur e nxjerr nga furra është në dëshirën tënde hedhja sipër e sheqerit pluhur me kanellë.